الجمعة، 9 يناير 2009

عيال سبيحه







تيتينه ذكيه زكريا









نفسى فى لعبه شبه ملوكه






عجبنى اوى اوى موضوع اللعب اللى تشبه العيال دا
بس للاسف التقنيه دى لسه مجتش مصر


الأحد، 4 يناير 2009

السبت، 3 يناير 2009

التاسع عدا .. ولا حس ولا خبر

النهارده اخر يوم فى التاسع ... معادى مع الدكتوره الساعه 2
رحت زى العادى متاخره لانها فى شارع بشع مفيهوش اى ركنه
المهم ربنا سهلى وركنت..
" وسبحان الله يومها جوزى مرضاش يجى معايا , قاللى يا نروح مشى ياما مش جاى ,قلتله مش همشى فى عز الحر دا ..
قالى لا هيه قالتلك تمشى كتير وانتى اللى بتدلعى ..
قلتله لا مش هقدر ...قالى خلاص مش جاى "
وفعلا نزلت انا وبصراحه كان عنده حق (هو دا وقت الذروه اللى بيقولوا عليه)
وصلت العياده وكالعادى اتلطعت لحد ماجه دورى
دخلت على الست الدكتوره وكشفت وقالتلى لا مفيش اى امل انك تولدى طبيعى... يانهار ابيض .. ليه بس كداا هو انا حالتى مستعصيه ولا ايه
قالتلى لا بس وضع الجنين مقلوب والراس لسه منزلتش وشويه كلام كتيير كدا خلاصته انى كدا كدا هولد قيصرى
وبصراحه الست الددكتوره طلعت ذوق وادتنى حريه الاختيار ياما تولدنى تانى يوم 8 الصبح على طوول او لو انا حابه استنى شويه يومين ولا حاجه يمكن الوضع يتغير بس برضه هيه من خلال خبرتها قالتلى لو جالك الطلق هتاخديه كله وفى الاخر هتولدى برضه قيصرى
يادى القلق طب اعمل ايه دلوقتى لازم اديها قرار عشان تحجزلى اوضه العمليات واللذى منه
اعمل ايه .. اعمل ايه
المهم اتوكلت على الله بعد طبعا ماكلمت جوزى ومامتى و دخلتلها تانى
ان شاء الله بكره على خيره الله
وفعلاا تانى يوم الصبح كنت فى المستشفى 7 و ربع مواعيد اللى هيه
8 الا ربع كنت فى العمليات والست الدكتوره مكنتش مصدقه نفسها انى جت قبل ميعادى قال ايه الشعب المصرى مواعيده اى كلام
الحمدلله انى رفعت راس الشعب المصرى ولو فى حاجه صغيره زى دى
ماعلينا.. دكتور البنج ادانى حقنه ساقعه كدا قلتله انا حاسه بحاجه ساقعه اوىىى قالى متقلقيش خالص هتنامى دلوقتى وفعلاا مكدبتش خبر دى كانت اخر حاجه اقولها وانا فى الاوضه دى
معرفش عدى اد ايه قالولى ساعه الا ربع بس لما طلعت بصيت فى الساعه لقيتها 9 ونص يعنى قعدت تقريبا ساعه ونص زطبعا تخللها الافاقه والحركات دى
اول حاجه سالت عليها جبت ايه ولوانى كنت عارفه انى هجيب بنت بس قلت مين عارف تيجى على اهون سبب وادبس فى كل اللبس الpink اللى جبته
قالولى بنوته وصحتها كويسه الحمدلله..
ودخلت اوضتى وانا شبه تايهه كدا.. اقوم وانام واقوم وانام..
وكل ماسال عليى بنوتى الاقيها نايمه لحد اللحظه الحاسمه
اول لحظه اشوف بنوتى واحضنها ..
حسيت انى ملكت الدنيا كلها فى ايدى.. و اتحدا اى حد يقولى على احساس احلى من داا
يارب ارزق كل الناس بالنعمه دى يارب ومتحرمش حد ابدا منهااا

تابعى نمو طفلك



المتوقع حدوثة فى الشهر الاول:
يرفع رأسه فترة بسيطه اثناء استلقائه
يركز على الوجوة
يستجيب لصوت مفاجئ بالصراخ او السكوت
الشهر الثانى:
يبتسم استجابه لابتسامتك
يؤكز البصر على بعد 15 سم
يستجيب للضوضاء
المناغاة وهى اصوات غير مفهومه
يرفع راسه لمستوى سطح الجسم لما تشيليه مقلوب
الشهر الثالث:
يرفع راسه بمقدار 45 درجة
تتبع وجه مألوف من جهه لاخرى
تثبيت حدقة العين فى عين الشخص اللى امامة ومتابعة حركات الوجة
الابتسام تلقائى
اصدار اصوات ابتهاج
ثبات الرأس عند سحبه من يديه فى وضع عمودى
وهو نايم على بطنه ممكن يوزن جسمه على ايديه المثنيتين
يبدأ ينظم مواعيد نومه ورضاعاته
الشهر الرابع:
يرفع رأسه 90 درجة وهو على بطنه
الضحك بصوت عالى
تتبع الاشياء
الصياح عاليا للفت النظر
الشهر الخامس:
الابتسامة المقصودة
الانقلاب على الجانبين احذرى السقوط
الشهر السادس:
يحمل على ساقية
الجلوس دون مساعدة
الاعتراض اذا اخدتى حاجة منه
تمرير الاشياء من ايد للثانية
محاولة الوصول لشئ بعيد
الشهر السابع:
اطعام نفسه
اصدار اصوات صاخبة
الوقوف مستندا الى شخص
الشهر الثامن:
اتجاهه نحو الصوت
اطعام نفسه بسكوتة
التقاط شيئ بين الابهام والسبابة
نطق ماما و بابا
تصفيق باليدين
فهم كلمة لا
يعمل باى باى
الشهر التاسع:
يسقط الاشياء ويبحث عنها
يحاول يمسك الملعقة
يبدأ بالتعرف على صورته بالمرآة
يجلس بنفسه
الشهر العاشر والحادى عشر :
تذداد الصفات السابقة
العاااااااااااااااام:
ينام مرة او مرتين ظهرا
يخبط مكعبين ببعض
يقول لأ برأسه
يزحف بسرعة
يمشى بالتسنيد
يرقص مع الموسيقى
يبدى الاهتمام بالكتب
يخاف من الغرباء
يتعلق بشئ ما مثل دبدوب
يفرد يديه ورجليه اثناء اللبس
يتعرف على نفسه فى المرآة
ممكن الطفل الطبيعى يتأخر من شهر لشهرين عن الحسابات السابقة فلا تقلقى الا اذا تأخر عن شهرين استشيرى طبيب اطفال