التحليل positive.. الف مبرووك

التحليل positive
يعنى ايه.. حامل ولا لا
ايوه يا مدام حضرتك حامل
طب احلفى:):)
والهى حضرتك حامل الف مبروك ربنا يتمملك على خير ان شاء الله...
يوم مش زى اى يوم فى حياتى
متهيالى عمرى ما هقدر انساه لانه احلى يوم فى حياتى ...
يوم ما عرفت انى حامل فى احلى بنوته فى الدنيا..
يومها خدت البنت اللى بتشتغل فى المعمل بالحضن...
طبعا اللى يسمع كدا يقول انى كنت حاله ميؤس منهااا, لكن كل الحكايه كانت سبع شهور تاخير..
مروا عليا كانهم سبع سنين.. يارب ارزق الناس كلها بالخلف الصالح قولوا ان شاء الله
اول حاجه عملتها لما عرفت انى قلت لبابايا ومامتى و بعدين جوزى...
و بعدين لفيت على كل قرايبى اقولهم وكانى نجحت فى الثانويه العامه بمجموع كبير..
ممكن اكون عملت كدا لانى مجبتش مجموع كبير فى ثانويه عامه فمعرفتش اقولهم بالسعاده دى:):):)
بس انا اتاكدت انه احلى شعور فى الدنيا لانى هبقى ام..
يااااه اخيرا هلاقى حد اطلع معاه كل مشاعر الامومه والخوف والقلق عليها..
اخيرا هلاقى حد اكله واشربه وابقى انا مصدر سعادته..
طبعا ربنا يخليلى جوزى بس مهما كان الزوج مش زى الضنا..ا لضنا غالى.. غالى اوى
دلوقتى بس عرفت انا ايه بالنسبه لماما وبابا واتاكدت من خوفهم عليا وحبهم ليا ..
يارب ميحرمش حد ابدا من ابوه وامه و يعوضنى خير فى ابويا ويرحمه ويغفرله ويجعل قبره روضه من رياض الجنه لانه احلى اب فى الدنيا دى كلها
بكره بقى احكيلكوا على اول يوم شفت ملوكه فيه